هتتعلم هنا ازاي تقدر تكتب سيرتك الذاتية باحتراف وإيه اللي تعمله علشان تتخطى المقابلة الشخصة
الإجابة تتلخص في خمس خطوات بسيطة لو مشيت عليها إن شاء الله هتوصل للوظيفة اللي بتحلم بيها
أولا : تحديد الهدف .
ثانيا : معرفة إمكانياتك .
بمعنى إنك بعد ما حددت الوظيفة اللي إنت عايز تشتغلها - هدفك - لازم تحدد قدراتك وتعرف إيه إمكانياتك وتشوف إيه اللي ناقصك علشان تشتغل في المكان ده يعني مثلا لو إنت بتعرف لغة وحابب تشتغل مترجم مثلا يبقى لازم تنمي قدراتك اللغوية أكتر وأكتر علشان تكون متميز عن المتقدمين للوظيفة وتتخطى المقابلة الشخصية بنجاح ولو عايز تكون مرشد سياحي مثلا يبقى لازم تقرا كويس في التاريخ ولازم يكون عندك المعلومات الكافية بالإضافة إلى اللغة اللي انت بتتكلمها.ثالثا : إنشاء السيرة الذاتية.
1: البيانات الشخصية :- وهي الإسم والسن والعنوان والصورة الشخصية - إن أمكن- وبيانات الإتصال بيك زي التليفون أوالإيميل بتاعك.
2: المؤهلات العلمية :- ودي بتذكر فيها مؤهلك الدراسي والدرجة وسنة التخرج والكلية أوالجامعة اللي اتخرجت منها بالإضافة إلى آخر درجة علميه حصلت عليها زي الماجستير والدكتوراه مثلا ة وتبدأ فيها بآخر درجة علمية حصلت عليها وانت بتكتب الدرجات العلمية بتاعتك.
3: الخبرات العملية :- بتوضح فيها خبراتك السابقة والوظايف اللي اشتغلتها ومجالات الشركات اللي اشتغلت فيها وسنوات الخبرة ولو معندكش خبرة في أي وظيفة الأفضل إنك تكتب ده في السيرة الذاتيه وده بيبين لصاحب العمل مدى صدقك وأمانتك وبيثق فيك وهو ده اللي عايزه صاحب العمل في الموظف بتاعه.
4: المهارت الشخصية :- ودي بتكتب فيها باختصار مهاراتك الإضافية زي اللغات وقدراتك في الحاسب الإلي والدورات اللي حصلت عليها في أي مجال وشهادات التقدير الحديثة بتاعتك ونشاطاتك التطوعية ................. وغيرها
دي أهم العناصر اللي بتتكون منها السيرة الذاتية بس فيه أمور مهمة لازم تراعيها وانت بتكتب سيرتك الذاتية زي :-
البساطة : يعني متحاولش تملا الــCV بتاعتك بحشو زائد مالوش لزمة فخير الكلام ما قل ودل يعني تركز على المعلومات المهمة وتحاول متتعداش الصفحتين علشان اللي بيقرا سيرتك الذاتية ميملش منها ويتوه منك.
المصداقية : ودي أهم نقطة ولازم تراعيها جيدا لأن صاحب العمل عايز موظف أمين وصدقني أي معلومة مزيفة هتكتبها في سيرتك الذاتية هتكون سبب في مشاكل ليك وهتسببلك إحراج بين زملاءك.
التركيز : لازم تكون مركز وانت بتكتب كل معلومة في سيرتك الذاتية وتحاول توصل لصاحب العمل معلومات محددة عنك يقدر يتعرف عليك بسهولة من خلالها علشان تساعدك في المقابلة الشخصية.
التجديد : حاول تجدد باستمرار في سيرتك الذاتية ولكن مع الحفاظ على المصداقية يعني ممكن تحسن مستواك في اللغة من جيد إلى جيد جدا مثلا وسنوات الخبرة بتاعتك بتتغير وممكن تضيف أي دورة أو شهاده حصلت عليها ............ وهكذا
رابعا : المقابلة الشخصية.
مطلوب منك تجمع بعض المعلومات عن الوظيفة اللي انت عايزها وكمان لازم تكون عارف بعض المعلومات عن الشركة ونشاطها ومجال عملها علشان تقدر تجاوب بيها لو سئلت مثلا "ليه عايز تشتغل معانا ؟ أو ليه اخترت شركتنا؟" ومطلوب منك كمان تكون مراجع معلوامت سيرتك الذاتية كويس علشان لو لخبطت في بند منها تخسر ثقة صاحب العمل علشان كده بنقولك إنك لازم تكون صادق في كل المعلومات اللي بتكتبها.
طيب إيه أهم الأمور اللي يجب عليك مراعاتها يوم المقابلة الشخصية ؟
1) الإلتزام : يعني لازم تكون ملتزم بميعاد المقابلة قدر الإمكان وكمان تلتزم بتعليمات الشركة أو المكان اللي هتحضر فيه المقابلة وتتجنب أي شئ ممكن يدخلك في جدال مع أي حد علشان متوترش نفسك.2) حسن المظهر : حاول تكون منسق في لبسك ومظهرك قدر الإمكان مع مراعاة البساطة فحسن المظهر ليس معناه التكلف ويفضل الزي الرسمي زي القميص والبنطلون - والكرفتة إن أمكن- ولو عندك بدلة يبقى أفضل ولو معندكش متقلقش فصاحب العمل بيبص للإستفاده اللي هياخدها منك أولا مش بيبض للمظهر.
3) الهدوء : حاول تكون هادئ وغير مرتبك ولازم تكون واثق من قدراتك ومهما كان عدد المتقدمين للوظيفة متقلقش مفيش حد أفضل منك لو إنت واثق من كده ولازم يكون عندك يقين إن كل شئ بإيد ربنا سبحانه وتعالى وإنه مش هيضيع تعبك إن شاء الله.
4) التركيز : ركز في نفسك ومتشغلش بالك باللي حواليك ومتسمعش لأي حد يحاول يخوفك من المقابلة ومتسألش أي حد عمل مقابلة قبلك علشان متشتتش نفسك ومتفكرش في حاجة شخصية ممكن تسبب لك توتر أوقلق ولو عندك أي مشكلة حاول تنساها قبل المقابلة علشان متأثرش عليك ويبان على ملامحك أثناء المقابلة.
5) اللباقة : حاول تكون لبق في تعاملك مع صاحب العمل أو من يقوم بمقابلتك وابدأ المقابلة بالسلام عليه وجاوب على أسئلته بإجابات مركزة ومفيده يحس من خلالها إنك إنسان متلعم وفاهم وعلى قدر من الثقافة بس بدون فزلكة ومتدخلش معاه في حوارات غير مفيده علشان ميملش منك - يعني بلاش تتفلسف على الراجل لتخسر الوظيفة - حتى لو حسيت من كلامك معاه إنك أفضل منه هو شخصيا فلازم ميحسش منك بده وحتى لو كان أصغر منك سنا فلازم يحس منك بالتقدير وبكده تكبر إنت في نظره.
6) الإبتسامة : ادخل المقابلة الشخصية وأنت مبتسم واجعل الإبتسامة عنوانك في المقابلة الشخصية وابتسم أثناء كلامك مع صاحب العمل فصاحب العمل يحب الموظف البشوش.وانهي المقابلة أيضا وانت مبتسم وتوجه إليه بعبارة رقيقة تشكره فيها على زوقه معاك في المقابلة وقولله إنك تتمنى تشتغل معاه وتستفيد منه.
خامسا : التسويق.
لازم تكمل كل الخطوات اللي فاتت بخطوة مهمة جدا وهي التسويق أو الدعاية لنفسك - أيوه دعاية لنفسك - وده بيتم من خلال الإشتراك في المواقع الإكترونية اللي بتقدم خدمات توظيف زي الموقع الشهير بيت دوت كوم وحاول تضيف نفسك في الجروبات المهتمة بالتوظيف وتابع أخبار الوظائف في الصحف أو على الإنترنت واشترك في المجموعات البريدية للمواقع اللي بتقدم خدمات توظيف
ثلاث خطوات للنجاح مع بيت دوت كوم
سجل سيرتك الذاتية مجانا من هنــــــــا
وأخيرا أتمنى لك التوفيق في حياتك وفي عملك
وأتمنى إن كلامي يكون مفيد ليك وتقدر تلاقي وظيفة أحلامك إن شاء الله
ليست هناك تعليقات:
إرسال تعليق